سلامات(للشاعر علي سلامه)

ليس من الضروري ان تكون مصري لمتلكك احساس بالدهشه والاعجاب عند الاستماع الي الشاعر المصري علي سلامه.
حيث انه بتعابير عاميه بسيطه يستطيع ان يلامس عمق النفس الانسانيه, وان ينقل للمتلقي من معاني ما تعجز عنه مقالات سرديه قويه اوبيان سياسي ملئ بالشعارات فهو كما يصفه النقاد سهل ممتنع متجدد.
الشاعر علي سلامه من مواليد 1960 بحي السيده زينب بالقاهره اب مصري لاسره ويعمل مهندس بترول, جرفه تيار الشعر العامي منذ 30 سنه فكانت باكوره قصائده مرثيه في ذكري الاديب عباس محمود العقاد.
تاثر في ابداعاته بالراحلين صلاح جاهين وبيرم التونسي اللذان عرفا ببساطه اللغه وعمقها وقربها من اليومي, الملامح ذاتها تطبع قصائد علي سلامه بل وطريقه لباسه والقائه .
بساطه تجعله ينفذ الي اعمق مشاعر المتلقي الذي يتفاعل مع الصوره الشعريه درجه التماهي .
يتناول علي سلامه في قصائد قصيره السياسه والاقتصاد والحب يتغير لون القصيده بتغير مزاج الشاعر ,فيكون رماديا غامقا مصور الواقع في اسوأ حالاته ثم يتحول الي الوردي الفاتح المعبر عن البهجه والامل , سخريه لاذعه وسهام تخترق قلب المتلقي وهكذا هي قصائد علي سلامه الذي يصف ب (المواطن الشاعر) اضافه الي كل مميزاته الفنيه , فشاعرنا غزير الانتاج حيث فاق مجموع قصائده الثلاثمائه وهو يعلق ع ذلك بان الشعر هو شئ كالرزق وانا شاعر مرزق فكلما رايت حدثا او عشت موقفا (اتخبط في قصديه)

الشاعر علي سلامه مقيم حاليا في دوله الامارات العربيه المتحده وهو يكتب في جريده المصري اليوم في عمود تحت اسم سلامات

وهنا مجموعه لاشعار علي سلامه التي زادت قما ذكرت سابقا ع 300 قصيده

اتمني ان تنال اعجابكم

مش دى .. بطاقتى
وده .. رقمى القومى
ودى .. الحقيقة ..
وده الخيال ....
ومش دي الخريطة ..
ودي المدينة ..
وده المحور ..
وده المترو ..
وكده يمين .. وكده شمال ..
مش ده ظابط .. وده عسكرى ..
وده طبيب .. وده كمسرى ..
وده منجد .. وده بقال ..
مش ده جامع .. ودى مدرسة
وده بيت دعارة ..
وده سمسار ..
وده شيال .....
مش ده فستان .. ودى جلابيه
وده شورت .. وده مفيش ..
وده شال ....
مش ده اتوبيس .. ودى عجلة
ودول حمير ....
ودولا جمال .....
مش ده عمى .. ودى أختى
و دول صحابى ..
وده كمال ....
مش ده شارعنا .. وده بيتنا ..
ودى مراتى ..
ودولا العيال ...
مش ده الوطن .. وده المواطن ...
وده التاريخ .. اللى إتقال ...
أمال ليه .. كل ما اروح فى حته
و أسأل سوأل ....
يقولولي .. جايز ... يمكن .... إحتمال

مش أنا امبارح
رحت من بيتنا في السيدة
للشغل في حلون
في سبع دقايق
لا شوفت حد زعلان
ولا حد متضايق
والورد إنسان
والنخل متعايق
والناس جميلة مؤدبة
والجو رايق
والدنيا ماشية لوحدها
ولا حد سايق
ومش انا
امبارح برضه
رجعت من الشغل في حلوان
لبيتنا في السيدة
في خمس دقايق
لا حاسس بغربة
ولا شايف غريب
وقلبي ابيض حليب
عندليب
كروان فرحان
شايل ف قلبي وف جيوبي
الفرح أشكال وألوان
وزعت ع الشوارع
والبيوت والجيران
وطلعت البيت
ضربت الجرس
فتحت مراتي وبالأحضان
والعيال كمان فرحانين
ناجحين وجايبين
الدرجات النهائية
من غير دروس خصوصية
قمنا رقصنا وغنينا
واحتفلنا واتغدينا
فضلة خيرك
سمك واستاكوزا
وجمبري م الكبير
وحلينا ب مهلبية
وشربنا الشاي كمان
وفجأة
لقيتني بردان بردان
بصيت لقيت
الشباك مفتوح
ومفيش بطانية
ومراتي جنبي وزي ما هيه
لسة بتعاني من آلام المفاصل
وده اللي حاصل
والحمد لله
على كل شيء

بقول لها ..
ما تيجي نهزر ..
نجري ونلعب ..
ونكسر كل الحاجات ..
ونجيب م اللي فات ..
يومين حلوين ....
قالتلي والنبي إنت فايق ورايق ..
قولتلها ...
طب وليه نتضايق ..
إحنا لسه صغيرين ..
وأكبر عيالنا ..
يا دوب تسع سنين ..
يعني لو بنحكم مصر ..
تبقي يا دوب لفة ونص ..
مش عشرين ..
- وطي صوتك البت بتذاكر ..
والواد مصدقت إنه نام ...
إنما إيه اللي صحي ف قلبك ..
من تاني الغرام ..
قولتلها جوايا كلمتين غزل ..
قالتلي والنبي إنت عسل ..
بس الظروف ..
- مالها الظروف ..
فاكرة لما كنتي ..
بتحوشي م المصروف ..
جبتيلي ورد ف عيد ميلادي ..
- وجبتلك بلوفر صوف ..
- وجبتيلي بلوفر صوف ..
- فاكر لما بوستني ..
وإحنا لسه مخطوبين وأبويا لاحظ ..
يالهوي كنت هموت م الكسوف
- فاكرةأول مرة قلت لك بحبك ..
وشك إحمر ..
- إنت اللي وشك كان مخطوف ..
- مش إنتي كنتي بترسمي زمان ..
- وإنت كمان كنت بتكتب شعر ..
- هو احنا بطلنا نحس ..
- إحنا بطلنا نشوف ...
وطلعنا اللب والسوداني ..
وفتحنا التليفزيون ..
وسكتنا تاني ..
ولا زال السبب ..
غير معروف ..
غير معروف

كلمات جميلة يا صفا

تسلم ايدك

شكرا يا علاء ع ردك

اتمني فعلا ان القصايد دي تعجبكم لانه بجد شاعر روعه

حكومة رقيقة أوي وشيك..
بتقفل كل البيبان والشبابيك..
عشان بتخاف علينا م البرد..
لأ إحساس مرهف بجد..
الأسمنت والحديد يغلي..
تقوم تبيع الأرض..
هو ده الفكر الجديد..
اللي بيبني المجد...
وشوف الحنان والطيبة والإنسانية..
سعر تصدير الغاز..
أقل من سعر الفول والطعمية..
ده علي اعتبار إن الناس لبعضيها..
والدنيا منفاتة..
وإحنا والحمد لله..
مش محتاجين أنابيب..
والمشتري مش غريب..
جربت الشاي بالحليب
ساعة الصبحية..
قراقيش بقي وسقي يا معلم
وانسي القضية..
ده تقريباً ماحدش شايف حد

صديقى اليابانى..
كان فى زيارة لمصر تانى..
وهو شخص ابن بلد ولذيذ
كان فرحان اوى واحنا بنتمشي
فى شارع عبد العزيز
...
قاللى شايف يا فريكيكو
كل ده يابانى...كل ده ياباني
وده الى خلانى اقوله...
طول عمرك يا سيكو سيكو خايب...!
شوف انت تسهر وتفكر وتصدر
وانا اخد جمارك وضرايب...
انت هنا فى بلاد العجايب...
امال ايه....
قاللى ايه الهيصه الكتير دي
واللمه
قلت له البلد كلها ثانويه
عامه
عندكو مكتب تنسيق يا سيكوسيكو...
قاللى بس ده مش حل يا فريكيكو
عندنا فى اليابان مفيش
مستحيل
قلت له عندنا ف مصر بالنا
طويل
وعندنا تلات اهرامات
ونيل...
ومستوره وزى الفل...مالك بقى
قاللى عندنا فى اليابان
المسئول اللى يغلط...
مفيش غير الانتحار..
قلتله عندنا ف مصر
الى يخربها بيخرج منها
معزز مكرم
من صاله كبار الزوار..!

ده المسامح كريم يا اخى
وبعدين....
روحنا اتغدينا كوارع فى الحسين
ومن ساعتها مش عارف هو فين
مشفتش
سيكوسيكو يا حج رضا...

ام عبدالله...
--------------
بقول لها...
احنا ليه يا ام عبدالله...
بنحللها لما نعوز...
و نحرمها لما نعوز...
و نعديها بحجة...
إن الدنيا حظوظ....
عارفه يا ام عبدالله...
انا نفسي يا ام عبدالله....
يبقى عندي نفوذ...
و تدلعيني بقى يا ام عبدالله...
أحسن وربنا...
أنحرف وأبوظ....
نفسي يا ام عبدالله...
يبقى عندي سلطه...
وفلوس...
واللي اقوله يتنفذ...
يعني قيام قيام...
جلوس جلوس...
ويبقى عندي اراضي كتير...
وبهايم...
معيز وحمير...
وبقر وجاموس...
ونفسي يا ام عبدالله...
ف حتة عيل ياخد كل شئ....
بالامر المباشر...
من غير ما يسهر ويتعب ويذاكر...
من غير كتب ومدارس...
ومدرسين ودروس...
قالتلي...
معلش يا خويا...
هو وجع الضروس وحش...
ربنا يشفيك...
يا راجل استغفر ربك...
انت يا راكبك عفريت...
يا ملبوس...
و وسع كده...
خليني ادي الواد اللبوس...
بتاع الحراره...
يا راجل...
ده انت بتخاف من حقنة الشيح...
مع انها زي شكة الدبوس..
منهم لله بقى....
اللي علموك شرب السيجاره

الحتة دي بتوجعني

بجد بجد بجد
هو ده المناخ
بس إنت إيه بقي
بلاش سمك
وبلاش أمل
وبلاش وطن
وبلاش فراخ
وهاتبقي زي الفل
شوف
الواد ده كان دمه عسل
ماعرفش ليه بلم كده
ومسخ وباخ
والواد زهقان م الكسل
ع الحلم راح لف لما داخ
والواد ده بقي فعلاً بطل
بيكسب فرنسا والبرازيل
ف البلاي ستيشن
ويوقع كل الطيارات طيخ طاخ
هو أنا ليه كل ما أقابل حد
يقوللي الحتة دي بتوجعني
والحتة دي بتوجعني
بقي معقول الناس
بعد العمر ده كله ما تعرفش
إن الطعمية بتعمل انتفاخ
يا راجل